Marita van Aswegen
Biografie
Wie is Marita van Aswegen
Marita van Aswegen is ‘n Vrystater en ‘n Suid-Afrikaanse skrywer. Sy skryf meestal in Afrikaans. Sy het reeds verskeie boeke, gedigte, sketse, kortverhale en vervolgverhale vir kinders, tieners en volwassenes geskryf. Die meeste van haar boeke en stories is al deur groot Suid-Afrikaanse uitgewers gepubliseer en van haar boeke is ook na Engels en Sotho vertaal.
Sy geniet dit die meeste om stories vir kinders te skryf. Sy verstaan die impak wat stories op kinders se lewens het en skryf daarom met groot verantwoordelikheid. Sy skryf graag oor dit wat sy daagliks sien en belewe en meng dit dan met magic. Haar stories word dikwels deur die landelike gemeenskap en haar ervaring as maatskaplike werkster beïnvloed. Kinders se moed en vermoë om bo hulle omstandighede uit te styg inspireer baie van die stories wat sy skryf.
Dit is vir haar ‘n voorreg om hierdie stories, wat ‘n mengsel van werklikheid en magic is, met lesers in Suid-Afrika en die res van die wêreld te deel. Sy hou daarvan as die lesers die storie geniet, daaroor nadink en spyt is wanneer dit eindig.
Agtergrond oor Marita van Aswegen
Marita van Aswegen is gebore op 19 Mei 1949 in die omgewing van Nylstroom Suid-Afrika en het opgegroei in ‘n landelike omgewing. Sy was op skool in Fouriesburg, Hobhouse en het gematrikuleer te Hoërskool Clocolan.
Na skool behaal sy die graad B.Soc.Sc aan die Vrystaatse Universiteit en doen vir 4 jaar lank maatskaplike werk. In 1973 trou sy met ‘n boer en bring die grootste deel van haar lewe op ‘n plaas buitekant Bloemfontein deur. Verder, behaal sy in 1981 die BA-graad in Afrikaans/Nederlands en Kommunikasiekunde by Unisa.
So lank as wat sy kon onthou, wou sy ‘n boek geskryf het. As tiener meisie, met ‘n kop vol rose, maanskyn en liefde, het sy haar eerste storie geskryf. Dit was ‘n liefdesstorie en sy het dit vir die “Sarie” gestuur, wat ‘n gunsteling tydskrif gedurende die sestiger jare was. Hulle het haar storie afgekeur, maar dit het haar nie gekeer om nog stories te skryf nie…
Gedurende die jare toe haar kinders klein was, het sy graag opstelle en gedigte geskryf. Die opstelle was oor humoristiese onderwerpe soos “Gaan haarkapper toe”, “Ons het elektrisiteit”, “Die dag toe ek ‘n tjek op die kar se dak vergeet het”, ensovoorts. Sy het veral gedigte vir klein kinders geskryf; dikwels vanuit die oogpunt van haar eie kinders se ervarings, asook gedigte waarin sy haar persoonlike gevoelens uitgedruk het. Twee van haar gedigte vir kinders is dertig jaar later gepubliseer in “Die nuwe verseboek” deur Riana Scheepers.
In 1997 is Marita van Aswegen se eerste boek gepubliseer. Sy het die storie vir verskeie uitgewers gestuur, maar dit is ses keer afgewys. Sy het nie opgegee nie. Nadat die boek uiteindelik in Afrikaans gepubliseer is, het Kwêla uitgewers dit ook in Engels en Sotho vertaal. Hierdie boek gaan oor ‘n posman wat ‘n brief vir ‘n ou man moet aflewer. Die ou man wag vir ‘n brief van sy kleinkind. Maar toe word hy deur ‘n rower aangeval en die posman is die een wat sy lewe red.
Inspirasie vir haar skryfwerk
Sy skryf omdat sy daarvan hou. Sy skryf graag oor wat sy daagliks sien en belewe en meng dit dan met magic.
Mense, veral kinders, fassineer haar. Op die plaas was sy in noue kontak met Sesotho – sprekende kinders. As maatskaplike werkster het sy te doen gekry met kinders wat in moeilike omstandighede moes grootword. Hier het sy ‘n wêreld leer ken waar kinders misbruik word en waar hulle min het. Tog het hierdie kinders eienskappe wat haar aangryp en inspireer.
Haar tyd op die plaas en as maatskaplike werkster het baie van haar skryfwerk beïnvloed. Sy glo aan mense se vermoëns om op te staan en die lewe in die gesig te kyk. Haar stories het egter ‘n groot stuk werklikheid in en word dikwels vanuit ‘n landelike, verarmde omgewing geskryf.
Addisioneel
Sy droom oor iets of sien iets wat haar tref, begin dan die storie ‘n lyf te gee en skryf dit neer. Terwyl sy skryf, verander die storie partykeer heeltemal.
Sy geniet dit om woorde te sien wat eers net gedagtes in haar kop was en dan om terugvoer te kry van lesers oor hoe hulle dit geniet het.
Sy lees moordverhale, speurverhale, tiener- en kinderverhale, geestelike boeke, Die Bybel, gedigte, reisverhale en kortverhale.
- I am pilgrim
- Spertyd
- Wonder
- Onse Vaders
- Silk
- A man called Ove
- Roald Dahl
- WA Tozer
- Fanie Viljoen
- Jaco Jacobs
- Petra Müller
- Abraham de Vries
- T.T Cloete
As stokperdjie hou sy daarvan om te skilder.
